76 : අද් දහ්ර් – කාලය

අද් දහ්ර් – කාලය

පරිච්ඡේදය: 76

මුළු වැකි ගණන : 31

මෙම පරිච්ඡේදයේ පළමු වැකියේ “කාලය” යන වචනය සඳහන් වන බැවින් එය මෙහි නම බවට පත් විය.

අසීමිත කරුණාවන්තයා ද අසම සම දයාවන්තයා ද වන අල්ලාහ්ගේ නාමයෙන්…

76 : 01 විශේෂයෙන් සඳහන් කළ හැකි දැයක් ලෙස(වත්) නොවූ කාලයක් මිනිසාට නොතිබුණේ ද?506

76 : 02 අපි මිනිසා පරීක්ෂා කරනු පිණිස484 මිශ්‍ර ශුක්‍රාණුවකින්207 ඔහු නිර්මාණය කළෙමු. ඔහු සවන් දෙන්නෙකු ද බලන්නෙකු ද කළෙමු.

76 : 03 ඔහුට යහ මග පෙන්වීමු. ඔහු කෘතඥ වන්නෙකුව හෝ ගුණ මකුවෙකුව හෝ සිටියි.

76 : 04 අපි (අපව) ප්‍රතික්ෂේප කරන අයට දම්වැල් ද විලංගු ද නිරය ද පිළියෙල කර ඇත්තෙමු.

76 : 05 සත් පුරුෂයෝ කුඩා පැන් බඳුනෙන් පානය කරති. එහි කපුරු මිශ්‍ර වී තිබේ.

76 : 06 එක් උල්පතක්` අල්ලාහ්ගේ වහලූන් එයින් පානය කරති. ඔවුහු (තමන්) සිටින තැන සිට ම එය ලබා ගනිති.

76 : 07 ඔවුහු භාරය ඉටු කරති. අයහපත පැතිර පවත්නා දිනකට1 බිය වෙති.

76 : 08 ඔහුට ඇලූම් කළ නිසා දුගියාට ද අනාථයාට ද සිරකරුවාට ද ආහාර පිරිනමති.

76 : 09 “අපි අල්ලාහ්ගේ මුහුණ උදෙසා නුඹලා වෙනුවෙන් ආහාර දෙන්නෙමු. නුඹලාගෙන් ප්‍රති උපකාරයක් හෝ ස්තූතියක් හෝ අපේක්ෂා නොකරන්නෙමු.”

76 : 10 “අපේ දෙවියන් වෙතින් ක්‍රෑර බවින් ද දුෂ්කරතාවෙන් ද පිරුණු දිනකට1 අපි බිය වන්නෙමු”(යි ඔවුහු පවසති).

76 : 11 එබැවින් අල්ලාහ් එදින1 විපතෙන් ඔවුන් ආරක්ෂා කළේය. ඔවුනට විකසිත භාවයක් ද සොම්නසක් ද පිරිනැමීය.

76 : 12 ඔවුන් ඉවසූ බැවින් ස්වර්ගය ද පට වස්ත්‍රය ද ඔවුනට තිළිණ කළේය.

76 : 13 ඔවුහු එහි උස් වූ අසුන් හි හාන්සි වී සිටිති. එහි ඉර ද අධික ශීතලය ද නොදකිති.

76 : 14 එහි සෙවණැලි ඔවුනට ළං ව තිබේ. එහි පලතුරු ඉතා පහතින් එල්ලෙමින් පවතී.

76 : 15 රිදී බඳුන් ද පළිඟු මෙන් කුසලාන ද ඔවුන් වටා ගෙන එනු ලැබේ.

76 : 16 එය රිදී මෙන් පළිඟු වලින් වූ කුසලානයන් ය. ඒවා සැලසුම් සහගතව පිහිටුවා ගනිති.

76 : 17 එහි පැන් බඳුන් වලින් පානය කරවනු ලබති. එහි ඉඟුරු මිශ්‍ර වී තිබේ.

76 : 18 එහි තිබෙන සල්සබීල් නම් උල්පතකින් පොවනු ලබති.

76 : 19 තාරුණ්‍යය වෙනස් නොවන කුඩා ළමුන් ඔවුන් වටා එති. ඔබ ඔවුන් දුටුවෙහි නම් විසුරුවා හරින ලද මුතු යැයි සිතන්නෙහි ය.

76 : 20 ඔබ දකින විට එහි සුඛෝපභෝගී ප්‍රමෝදය ද මහා රාජ්‍යයක් ද දකින්නෙහි ය.

76 : 21 ඔවුන් මත කොළ පැහැති සුන්දුස් නමැති පට වස්ත්‍රයක් ද ඉස්තබරක් නමැති පට වස්ත්‍රයක් ද තිබේ. ඔවුහු රිදී වළලූ පළඳවනු ලබති. ඔවුන්ගේ දෙවියන් පිවිතුරු පානයක් ඔවුනට පානය කරවයි.

76 : 22 මෙය යි, නුඹලාට හිමි කුලිය. නුඹලාගේ උත්සහයට කෘත ගුණ දක්වනු ලැබේ.6

76 : 23 (මුහම්මද්,) මෙම කුර්ආනය ඔබට ටිකෙන් ටික පහළ කළේ අපි ය.447

76 : 24 එබැවින් ඔබේ දෙවියන්ගේ අණ වෙනුවෙන් රැඳි සිටින්න. ඔවුන්ගෙන් පාපයන් සිදු කරන්නාට හෝ (එකම දෙවියන්) ප්‍රතික්ෂේප කරන්නාට හෝ අවනත නොවන්න.

76 : 25 ඔබේ දෙවියන්ගේ නාමය උදය සවස සිහි කරන්න.

76 : 26 රාත්‍රියෙහි ඔහුට සජ්දා කරන්න. දීර්ඝ රාත්‍රියක් ඔහු සුවිශුද්ධ කරන්න.

76 : 27 ඔවුහු මෙලොව ප්‍රිය කරති. තමන්ට පසුව (පැමිණීමට නියමිත) දුෂ්කර දිනය1 අත් හැර දමති.

76 : 28 අපි ඔවුන් නිර්මාණය කළෙමු. ඔවුන්ගේ ව්‍යූහය ශක්තිමත් කළෙමු. අපි සිතුවෙමු නම් ඔවුන් වෙනුවට ඔවුන් වැනි අය ගෙන එන්නෙමු.

76 : 29 මෙය අනුශාසනාවකි. කැමති කෙනෙක් තම දෙවියන් වෙතට මගක් ඇති කර ගනියි.

76 : 30 අල්ලාහ් සිතන දේ මිස නුඹලා නොසිතන්නෙහු ය. අල්ලාහ් සර්වඥයෙක් ද ප්‍රඥාවන්තයෙක් ද වේ.

76 : 31 ඔහු සිතන කෙනෙකු තම දයාවෙහි ඇතුළු කරවයි. ඔහු අපරාධකරුවන්ට පීඩාකාරී වේදනාවක් පිළියෙල කර ඇත.