59 : අල් හෂ්ර් – පිටුවහල් කිරීම

අල් හෂ්ර් – පිටුවහල් කිරීම

පරිච්ඡේදය: 59

මුළු වැකි ගණන : 24

මෙම පරිච්ඡේදයේ දෙවන වැකිය ප්‍රථම වරට යුදෙව් ජාතිකයින් රටින් පිටුවහල් කරනු ලැබීම ගැන සඳහන් වන බැවින් ‘පිටු වහල් කිරීම’ යනුවෙන් මෙය නම් කරන ලදී.

අසීමිත කරුණාවන්තයා ද අසම සම දයාවන්තයා ද වන අල්ලාහ්ගේ නාමයෙන්…

59 : 01 අහස්හි ද පොළොවෙහි ද තිබෙන දැය අල්ලාහ් සුවිශුද්ධ කරයි. ඔහු අබිබවන්නා ය, ප්‍රඥාවන්තයා ය.

59 : 02 ධර්ම ග්‍රන්ථය හිමි අය27 අතර සිටින (එකම දෙවියන්) ප්‍රතික්ෂේප කළ අය ඔවුන්ගේ නිවෙස් වලින් පළමු පිටුවහල් කිරීමක් වශයෙන් පිටුවහල් කළේ ඔහු ය. ඔවුහු පිටුවහල් වනු ඇතැයි නුඹලා නොසිතුවෙහු ය. තමන්ගේ බලකොටු අල්ලාහ්ගෙන් තමන් ආරක්ෂා කරනු ඇතැයි ඔවුහු සිතූ හ. ඔවුන් නොසිතූ අයුරින් අල්ලාහ් ඔවුන් වෙත පැමිණියේ ය. ඔවුන්ගේ සිත්හි බිය හට ගැන්වීය. ඔවුහු තමන්ගේ නිවෙස් තම අත් වලින් ද විශ්වාස කළ අයගේ අත් වලින් ද විනාශ කළහ. බුද්ධිමතුනි, ඉගෙනුමක් ලබන්න.

59 : 03 අල්ලාහ් ඔවුනට පිටුවහල් වීම නියම නොකළා නම් ඔහු මෙලොව දී ම ඔවුනට දඬුවම් කරන්නට තිබුණි. පරලොව දී ඔවුනට නිරයේ වේදනාව ඇත.

59 : 04 මෙයට හේතුව ඔවුන් අල්ලාහ්ට ද ඔහුගේ දූතයාට ද එරෙහිව සිටීම ය. යමෙක් අල්ලාහ්ට එරෙහි වන්නේ ද අල්ලාහ් දරුණු ලෙස දඬුවම් කරන්නෙකි.

59 : 05 නුඹලා (ඔවුන්ගේ) රට ඉඳි ගස් කපා දැමීම ද එහි මුල් සමඟ කපා නොදැමීම ද අල්ලාහ්ගේ කැමැත්ත පරිදි ම සිදු විය. ඔහු වරදකරුවන්ට නින්දා කරයි.

59 : 06 අල්ලාහ් තම දූතයාට ඔවුන්ගෙන් අත්පත් කර දුන් දැය වෙනුවෙන් නුඹලා අශ්වයෙකු හෝ ඔටුවෙකු හෝ ආරෝහණය නොකළෙහු ය. නමුත් අල්ලාහ්, තමා සිතූ කෙනෙකු මත දූතයින් පවරයි. අල්ලාහ් සියලූ දේ කෙරෙහි බලසම්පන්නයෙකි.

59 : 07 විවිධ ග්‍රාම වාසීන්ගෙන් අල්ලාහ් තම දූතයාට අත්පත් කර දුන් දැය අල්ලාහ්ට ද මේ දූතයාට ද ඥාතීන්ට ද අනාථයින්ට ද රෝගීන්ට ද අභිකුණ්ටිකයින්ට ද206 හිමිය. නුඹුලාගෙන් ධනවතුන් අතර ම (ධනය) සංසරණය නොවිය යුතු බැවින් (මෙසේ බෙදා දෙයි).195 මෙම දූතයා නුඹලාට කවරක් දුන්නේ ද එය අර ගන්න. කවරකින් නුඹලා වැළැක් වූයේ ද (එයින්) වැළකෙන්න. අල්ලාහ්ට බිය වන්න. අල්ලාහ් දරුණු ලෙස දඬුවම් කරන්නෙකි.

59 : 08 තම නිවෙස් වලින් ද දේපළ වලින් ද පිටුවහල් කරන ලද දිළිඳු මුහාජිර්වරුනට ද (හිමිය). ඔවුහු අල්ලාහ්ගෙන් දයාවක් ද තෘප්තියක් ද අපේක්ෂා කරති. අල්ලාහ්ට ද ඔහුගේ දූතයාට ද උදව් කරති. සත්‍යවන්තයෝ ඔවුහු ම ය.

59 : 09 මොවුනට පෙර විශ්වාසය ද මේ ගම්මානය ද තමන් සතු කර ගත් අයට ද (හිමිය). ඔවුහු හිජ්රත්460 කර තමන් වෙත පැමිණෙන අයට ඇලූම් කරති. ඔවුනට දෙනු ලබන දැය ගැන තම සිත්හි ඊර්ෂ්‍යාවක් ඇති කර නොගනිති. තමන්ට දුප්පත්කම තිබියදීත් තමන්ට වඩා (ඔවුනට) ප්‍රමුඛත්වය ලබා දෙති. තමන් තුළ තිබෙන මසුරුකමෙන් ආරක්ෂා කරනු ලබන අය ජය ලද්දෝ වෙති.

59 : 10 ඔවුනට පසුව පැමිණි අය “අපේ දෙවියනි, අපට ද විශ්වාසය සමඟ අපට පෙර ගිය අපේ සොහොයුරන්ට ද ක්ෂමාව දෙනු මැනව` අපේ සිත්හි විශ්වාස කළ අය කෙරෙහි පිළිකුලක් ඇති නොකරනු මැනව` අපේ දෙවියනි, ඔබ අනුකම්පාව ඇති කෙනෙක් ය, අසම සම දයාවන්තයෙක් යැ”යි පවසති.

59 : 11 (මුහම්මද්,) ඔබ කුහකයින් ගැන නොදන්නෙහි ද? “නුඹලා පිටුවහල් කරනු ලැබුවහොත් අපිත් නුඹලා සමග බැහැර වන්නෙමු. නුඹලාගේ විෂයයෙහි අපි කිසිවෙකුට කිසිවිටෙක අවනත නොවන්නෙමු. නුඹලා කෙරෙහි සටනක් අරඹනු ලැබුවහොත් අපි නුඹලාට උදව් කරන්නෙමු”යි ධර්ම ග්‍රන්ථය හිමි අය27 අතර සිටින (එකම දෙවියන්) ප්‍රතික්ෂේප කළ අයට ඔවුහු පවසති. ඔවුහු බොරුකරයෝ යැයි අල්ලාහ් සාක්ෂි දරයි.

59 : 12 ඔවුහු පිටුවහල් කරනු ලැබුවහොත් මොවුහු ඔවුන් සමඟ බැහැර නොවෙති. ඔවුන් කෙරෙහි සටනක් අරඹනු ලැබුවහොත් ඔවුනට උදව් ද නොකරති. මොවුහු ඔවුන්ට උදව් කළත් පිටු පා පලා යති. පසුව උදව් කරනු නොලබති.

59 : 13 ඔවුන්ගේ සිත් හි අල්ලාහ්ට වඩා නුඹලා ගැන මහත් බියක් පවතී. මෙයට හේතුව ඔවුන් වටහා නොගන්නා පිරිසක් වීම ය.

59 : 14 බලකොටු තනන ලද ගම්මාන වල සිට හෝ බිත්ති වලට පිටු පසින් සිට හෝ මිස ඔවුහු එක්සත්ව නුඹලා සමඟ සටන් නොකරති. ඔවුන් අතර වෛරය දරුණු ය. ඔවුහු එක්සත් යැයි ඔබ සිතන්නෙහි ය. නමුත් ඔවුන්ගේ සිත් සී සී කඩ වී ඇත. මෙයට හේතුව ඔවුන් වටහා නොගන්නා පිරිසක් වීමයි.

59 : 15 ඔවුනට සුළු කලකට පෙර සිටි ජන සමාජයක් මෙන් (ඔවුහු සිටිති). ඔවුහු තම කටයුතු වල විපාකය භුක්ති වින්ඳ හ. ඔවුනට පීඩාකාරී වේදනාවක් ඇත.

59 : 16 “(එකම දෙවියන්) ප්‍රතික්ෂේප කරනු”යි මිනිසාට පවසා ඔහු ප්‍රතික්ෂේප කළ පසු “මම නුඹගෙන් වැළකුණෙක්මි. විශ්වයේ දෙවියන් වන අල්ලාහ්ට බිය වෙමි”යි කී ෂෛතාන් වැනි අය වෙති.

59 : 17 ඔවුන් දෙදෙනාගේ අවසානය නිරයේ සදාකාලීනව සිටීම ය. අපරාධකරුවන්ට දඬුවම මෙයයි.

59 : 18 විශ්වාස කළ අයවලූනි, අල්ලාහ්ට බිය වන්න. සෑම කෙනෙක් ම තමන් හෙට ඉපැයූ දැය ගැන සලකා බලත්වා` අල්ලාහ්ට බිය වන්න. අල්ලාහ් නුඹලා කරන දේ ගැන ප්‍රවීණයෙකි.

59 : 19 අල්ලාහ් අමතක කළවුන් මෙන් නොවන්න. ඔහු ඔවුනට ඔවුන් ම අමතක කරවීය. වරදකරුවෝ ඔවුහු ම ය.

59 : 20 නිරාවාසීහූ ද ස්වර්ගවාසීහූ ද එක සමාන නොවෙති. ජයග්‍රාහකයෝ ස්වර්ගවාසීහූ ය.

59 : 21 අපි මේ කුර්ආනය කන්දක් මත පහළ කර ඇත්නම් එය අල්ලාහ්ගේ බියෙන් බැගෑපත් ව සුනු විසුනු වනු ඔබ දකින්නෙහි ය. මිනිසුන් සිතනු පිණිස අපි මේ උපමාවන් ඔවුනට ප්‍රකාශ කරන්නෙමු.

59 : 22 ඔහු ය, අල්ලාහ්. ඔහු හැර නැමදීමට සුදුස්සා අන් කිසිවෙක් නැත. ගුප්ත දැය හා ප්‍රත්‍යක්ෂ දැය ගැන සර්වඥයා ය. ඔහු අසීමිත කරුණාවන්තයා ය¦ අසම සම දයාවන්තයා ය.

59 : 23 ඔහුය, අල්ලාහ්. ඔහු හැර නැමදීමට සුදුස්සා අන් කිසිවෙක් නැත. (ඔහු) මහා රජු ය, සුවිශුද්ධවන්තයා ය.10 සැනසුම දෙන්නා ය, ආරක්ෂාව සලසන්නා ය, අධීක්ෂණය කරන්නා ය, අබිබවන්නා ය, ආධිපත්‍ය පතුරුවන්නා ය, මහෝදාර ය, ඔවුන් කල්පනය කරන සමානයන් කෙරෙන් ඔහු සුවිශුද්ධවන්තයා ය.10

59 : 24 ඔහු ය, අල්ලාහ්. (ඔහු) නිර්මාපකයා ය, උත්පාදකයා ය, හැඩරුව සකස් කරන්නා ය, ඔහුට ලස්සන නාමයන් ඇත. අහස් හි ද පොළොවෙහි ද තිබෙන දැය ඔහු සුවිශුද්ධ කරයි. ඔහු අබිබවන්නා ය, ප්‍රඥාවන්තයා ය.