46 : අල් අහ්කාෆ් – වැලි කඳු

පරිච්ඡේදය: 46

මුළු වැකි ගණන : 35

මෙම පරිච්ඡේදයේ 21 වන වැකියේ හූද් නම් ධර්ම දූතයා වැලි කඳු මත සිටගෙන ධර්ම ප්‍රචාරයක් සිදු කළ බව සඳහන් වන බැවින් මෙසේ නම් කරන ලදී.

අසීමිත කරුණාවන්තයා ද අසම සම දයාවන්තයා ද වන අල්ලාහ්ගේ නාමයෙන්…

46 : 01 හා, මීම්.2

46 : 02 (මෙය) අබිබවන්නා ද ප්‍රඥාවන්තයා ද වන අල්ලාහ් වෙතින් පහළ වූ ධර්ම ග්‍රන්ථයයි.

46 : 03 අපි අහස් ද පොළොව ද ඒවා අතර තිඛෙන දැය ද සාධාරණ හේතුවකට ද නියමිත කාල සීමාවකට ද මිස නිර්මාණය නොකළෙමු. (අප) ප්‍රතික්ෂෙප කරන අය තමන්ට අවවාද කරන ලද දැයට පිටු පාමින් සිටිති.

46 : 04 “අල්ලාහ් හැර නුඹලා කැඳවන අය පොළොවෙහි නිර්මාණය කළේ කුමක් දැ”යි මට පෙන්වන්න. නැතහොත් ඔවුනට අහස්හි කොටසක් තිබේ ද? යන්නට පිළිතුරු දෙන්න. නුඹලා සත්‍යවන්තයින් නම් මීට පෙර පැවති ධර්ම ග්‍රන්ථයක් හෝ නැණවත් සාධකයක් හෝ මා වෙත ගෙන එන්නැ” යි (මුහම්මද්,) අසන්න.

46 : 05 කියාමත් දින1 තෙක් තමන්ට පිළිතුරු නොදෙන, අල්ලාහ් නොවන අය කැඳවන්නාට වඩා ඉතා දුර් මාර්ගිකයා කවරෙක් ද? ඔවුහු තමන් කැඳවීම ගැන නොදැනුවත් ව සිටිති.

46 : 06 ජනතාව එක් රැස් කරනු ලබන විට ඔවුහු මොවුනට සතුරන් බවට පත් වෙති. මොවුහු තමන්ට නැමදුම් කිරීම ද ප්‍රතික්ෂේප කරති.

46 : 07 මොවුනට අපේ පැහැදිලි වැකි ප්‍රකාශ කරනු ලබන විට තමන් වෙත පැමිණි සත්‍යය ප්‍රතික්ෂේප කරන අය “මෙය පැහැදිලි හූනියමක් යැ”යි පවසති.

46 : 08 “මොහු මෙය ප්‍රබන්ධ කළේ යැ”යි ඔවුහු පවසන්නෝ ද? මම මෙය ප්‍රබන්ධ කර ඇත්නම් අල්ලාහ්ගෙන් සුළුවෙන් හෝ මා ආරක්ෂා කිරීමට නුඹලාට නොහැකිය. නුඹලා කවරක් තුළ ගිලී සිටින්නෙහු ද ඔහු ඒ ගැන මැනවින් දනියි. මා හා නුඹලා අතර සාක්ෂිකරුවෙකු වීමට ඔහු ප්‍රමාණවත් ය. ඔහු ක්ෂමා කරන්නා යත අසම සම දයාවන්තයා යැ”යි (මුහම්මද්,) පවසන්න.

46 : 09 .”මම දූතයින්ගෙන් අලූත් කෙනෙක් නොවෙමි. මට හෝ නුඹලාට හෝ කුමක් කරනු ලැබේ දැ”යි මම නොදනිමි. මට දැනුම් දෙනු ලබන දේ මිස අන් කිසිවක් මම අනුගමනය නොකරමි. මම පැහැදිලිව අවවාද කරන්නෙක් මිස වෙන නැතැ”යි පවසන්න.

46 : 10 මෙය අල්ලාහ් වෙතින් පැමිණ තිබිය දී, ඉස්රායීල්ගේ දරුවන්ගෙන් සාක්ෂිකරුවෙක් මෙවැනි දැයකට සාක්ෂි දරා විශ්වාස කර සිටිය දී, නුඹලා (මෙය) ප්‍රතික්ෂේප කර උඩඟු වුවහොත් (කුමක් සිදු වේ ද යන්නට) පිළිතුරු දෙන්නැ”යි (මුහම්මද්,) අසන්න. අල්ලාහ් අපරාධ කරන පිරිසට යහ මග පෙන්වන්නේ නැත.

46 : 11 “මෙය විශිෂ්ට දෙයක් නම් ඔවුහු අපට පෙරාතුව මෙයට ඉදිරිපත් නොවෙති”යි විශ්වාස කළ අය ගැන (එකම දෙවියන්) ප්‍රතික්ෂේප කරන අය පවසති. ඔවුහු මෙමගින් යහ මග නොලබන විට “මෙය පැරණි බොරුවක් යැ”යි පවසති.

46 : 12 මීට පෙර මූසාගේ ධර්ම ග්‍රන්ථය ආදර්ශයක් ද දයාවක් ද විය. මෙය අපරාධකරුවන්ට අවවාද කිරීමට ද යහපත කරන අයට සුබාරංචි කීමට ද අරාබි489 බසින් වූ ධර්ම ග්‍රන්ථයකි.227 (මෙය පෙර පැවති ධර්ම ග්‍රන්ථයන්) සත්‍යය කරවන්නකි.

46 : 13 “අපගේ දෙවියන් අල්ලාහ් ම යැ”යි පවසා පසුව ස්ථීරව සිටි අයට කිසිඳු බියක් නැත. ඔවුන් දුක් වන්නේ ද නැත.

46 : 14 ඔවුහු ස්වර්ගවාසීහූ ය. ඔවුහු එහි සදාකාලීන ව සිටිති. (මෙය) ඔවුන් කළ දැයට කුලියකි.

46 : 15 තම දෙමාපියන්ට යහපත කරන ලෙස අපි මිනිසාට අවධාරණය කර ඇත්තෙමු. ඔහුගේ මව අසීරුවෙන් ඔහු ඉසුලූවා ය. අසීරුවෙන් ඔහු ප්‍රසූත කළා ය. ඔහුව ඉසිලීමත් කිරි වැරීමත් මාස තිහකි.314 ඔහු තම තරුණ වියට පැමිණ හතලිස් වන විය ලබන විට මාගේ දෙවියනි, මට ද මාගේ දෙමාපියන්ට ද ඔබ දැක් වූ අනුග්‍රහයට කෘතඥ වීමට ද ඔබ තෘප්තිමත් වන යහපත් ක්‍රියා කිරීමට ද මට අවස්ථාවක් උදා කරනු මැනව මා වෙනුවෙන් මාගේ පෙළපත ද ක්‍රමවත් කරනු මැනව` මම ඔඛෙන් ක්ෂමාව අයැදිමි. මම මුස්ලිම්වරුන්ගෙන්295 කෙනෙක්මි”යි පවසයි.340

46 : 16 . ඔවුන් කළ යහපත් ක්‍රියා අපි ඔවුන්ගෙන් පිළිගන්නෙමු. ඔවුන්ගේ අයහපත් ක්‍රියා ක්ෂමා කරන්නෙමු. ඔවුහු ස්වර්ගවාසීන් අතර සිටිති. (මෙය) ඔවුනට පොරොන්දු වන ලද සැබෑ පොරොන්දුවයි.

46 : 17 “(නැවත) ජීවය දෙනු ලබන්නෙමියි නුඹලා දෙදෙනා මා බිය ගන්වන්නෙහු ද? චීඃ මට පෙර බොහෝ පරම්පරාවන් උකුත් වී ඇතැ”යි කෙනෙක් තම දෙමාපියන්ට පැවසීය. නමුත් ඔවුහු අල්ලාහ්ගෙන් ආරක්ෂාව පැතූහ. “නුඹට විනාශයක් ම යත විශ්වාස කරනු. අල්ලාහ්ගේ පොරොන්දුව සැබෑ යැ” යි ඔවුහු පැවසූ හ. එයට ඔහු “මෙය මුතුන් මිත්තන්ගේ කල්පිත කථාවක් මිස වෙන නැතැ”යි පැවසීය.

46 : 18 ඔවුනට පෙර සිටි ජින්වරුන් හා මිනිසුන් සමඟ එක් ව මොවුනට එරෙහි ව දෙවියන්ගේ අණ ස්ථීර විය. මොවුහු අලාභ ලැබූහ.

46 : 19 සෑම කෙනෙකුට ම ඔවුන් කළ ක්‍රියා වලට අනුව තනතුරු ඇත. ඔවුන්ගේ ක්‍රියා වලට ඔහු මුළුමනින් ම කුලිය පිරිනමයි. ඔවුහු අපරාධ කරනු නොලබති.

46 : 20 (එකම දෙවියන්) ප්‍රතික්ෂේප කළ අය නිරය වෙතට ගෙන එනු ලබන දින1 “නුඹලාගේ ලෞකික ජීවිතයේ දී නුඹලාගේ යහපත් ක්‍රියා නුඹලා ම විනාශ කර ගත්තෙහු ය. එහි දී ම සැප වින්ෙඳහු ය. නුඹලා පොළොවෙහි යුක්තියෙන් තොරව උඩඟු වෙමින් සිටි බැවින් ද නුඹලා වැරදි කරමින් සිටි බැවින් ද අද නින්දනීය වේදනාවක් තිළිණයක් ලෙස දෙනු ලබන්නෙහු යැ”(යි පවසනු ලැබේ).

46 : 21 “නුඹලා අල්ලාහ් හැර (අන් කිසිවෙක්) නොනැමදිය යුතුයත නුඹලා කෙරෙහි ඉමහත් දිනක1 වේදනාවට මම බිය වෙමි”යි ආද් ජන සමාජයට ඔවුන්ගේ සොහොයුරු (හූද්) වැලි කඳු මත සිටගෙන අවවාද කළ සැටි සිහි කරන්න. ඔහුට පෙර ද පසු ද අවවාද කරන්නෝ උකුත් වී ඇත.

46 : 22 “අපගේ දෙවිවරුන්ගෙන් අප හරවන්නට නුඹ අප වෙත පැමිණියෙහි ද? නුඹ සත්‍යවන්තයෙක් නම් අපට අවවාද කරන දැය අප වෙත ගෙන එනු”යි ඔවුහු පැවසූ හ.

46 : 23 “(මේ පිළිබඳ) දැනුම අල්ලාහ් වෙත ම ඇත. මම කවරක් දී එවන ලද්දෙමි ද එය නුඹලාට පැහැදිලිව ප්‍රකාශ කරමි. නමුත් නුඹලා මුග්ධ පිරිසක් ව මම දකිමි”යි ඔහු පැවසීය.

46 : 24 එය තම මිටියාවත් දෙසට එන වලාකුළක් යැයි සිතූහ. “මෙය අපට වැසි ලබා දෙන වලාකුළක් යැ”යි ද පැවසූ හ. “නැත. නුඹලා කවරක් උදෙසා හදිසි වූයෙහු ද එයයි, මෙය. පීඩාකාරි වේදනාවෙන් පිරී සුළඟක් යැ”(යි පවසන ලදී).

46 : 25 එය තම මිටියාවත් දෙසට එන වලාකුළක් යැයි සිතූහ. “මෙය අපට වැසි ලබා දෙන වලාකුළක් යැ”යි ද පැවසූ හ. “නැත. නුඹලා කවරක් උදෙසා හදිසි වූයෙහු ද එයයි, මෙය. පීඩාකාරි වේදනාවෙන් පිරී සුළඟක් යැ”(යි පවසන ලදී).

46 : 26 නුඹලාට සලසා නුදුන් සැප පහසුකම් අපි ඔවුනට සලසා දී තිබුණෙමු. අපි ඔවුනට ශ්‍රවණය ද දෘෂ්ටි ද හදවත් ද ඇති කළෙමු. ඔවුන්ගේ ශ්‍රවණය ද දෘෂ්ටිය ද හදවත් ද ඔවුන් අල්ලාහ්ගේ සලකුණු ප්‍රතික්ෂේප කරමින් සිටින විට ඔවුනට සුළු වශයෙන්වත් ප්‍රයෝජනවත් නොවීය. ඔවුන් විහිළු කරමින් සිටි දැය ඔවුන් වටලා ගත්තේ ය.

46 : 27 අපි නුඹලා වටා පැවති බොහෝ ගම්මාන විනාශ කර ඇත්තෙමු. මොවුන් ශිෂ්ටවත් වනු පිණිස අපි සාධක පැහැදිලි කරන්නෙමු.

46 : 28 ඔවුහු අල්ලාහ් හැර කවරෙකු ළං වීමක් ඇති කරන දෙවිවරුන් යැයි මනඃකල්පිතව සිතුවෝ ද ඔවුන් මොවුනට උදව් කර තිබිය යුතු නොවේ ද? නමුත් මොවුන්ගෙන් ඔවුහු අතුරු දහන් වූහ. මෙය මොවුන්ගේ බොරුව ද ප්‍රබන්ධය ද වේ.

46 : 29 (මුහම්මද්,) මෙම කුර්ආනයට සවන් දෙනු පිණිස අපි ජින් වරුන්ගෙන් පිරිසක් ඔබ වෙත එවූ සැටි සිහි කරන්න. ඔවුහු ඔහු වෙත පැමිණි විට “කට පියා ගන්නැ”යි කීහ. (පාරායණා කර) අවසන් වූ විට තම සමූහය වෙතට අවවාද කරන්නෝ ව හැරුණ හ.

46 : 30 “අපේ සමූහයනි, මූසාට පසුව පහළ වූ ධර්ම ග්‍රන්ථයකට අපි සවන් දුනිමු. එය තමන්ට පෙර පැවති දැය4 සත්‍යය කරවන්නේ ය. එය සත්‍යයට ද සෘජු මාර්ගයකට ද මග පෙන්වන්නේ යැ”යි ඔවුහු කීහ.

46 : 31 “අපේ සමූහයනි, අල්ලාහ්ගේ කැඳවුම්කරුට පිළිතුරු දෙන්න. ඔහු ගැන විශ්වාස කරන්න. ඔහු (අල්ලාහ්) නුඹලාට නුඹලාගෙ පාපයන් ක්ෂමා කරයි. පීඩාකාරි වේදනාවෙන් නුඹලා ආරක්ෂා කරයි.

46 : 32 අල්ලාහ්ගේ කැඳවුම්කරුට පිළිතුරු නොදෙන්නා පොළොවෙහි අල්ලාහ්ව පරාජය කරන්නෙක් නොවේ. ඔහු හැර ඔවුනට ආරක්ෂකයින් ද නැත. ඔවුහු පැහැදිලි දුර් මාර්ගයක සිටිති (යි ද කීහ).

46 : 33 අහස් හා පොළොව නිර්මාණය කර ඒවා නිර්මාණය කිරීමෙහි වෙහෙසට පත් නොවූ අල්ලාහ් මළවුන්ට ජීවය දෙන්නට බලසම්පන්නයෙක් බව ඔවුහු නොසිතුවෝ ද? එසේ ය. ඔහු සියලූ දේ කෙරෙහි බලසම්පන්නයෙකි.

46 : 34 (එකම දෙවියන්) ප්‍රතික්ෂේප කරන අය නිරය ඉදිරිපිට නතර කරනු ලබන දින1 “මෙය සත්‍යය නොවේ දැ”(යි අසනු ලැබේ). “එසේ ය. අපගේ දෙවියන් මත දිවුරමු”යි ඔවුහු පවසති. “නුඹලා (මා) ප්‍රතික්ෂේප කළ අය වූ බැවින් වේදනාව රස විඳින්නැ”යි (දෙවියන්) පවසයි.

46 : 35 ස්ථීරසාර දූතවරු ඉවසුවා සේ ඔබත් ඉවසන්න. මොවුන් කෙරෙහි ඉක්මන් නොවන්න. මොවුනට අවවාද කරන ලද දැය මොවුන් දකින දින දහවලෙන් සුළු මොහොතක් මිස (ලොවෙහි) වාසය නොකළා සේ (ඔවුහු සිතති). මෙය පැහැදිලිව ප්‍රකාශ කරනු ලැබිය යුත්තකි. වැරදි කරන පිරිසක් මිස (අන් අය) විනාශ කරනු ලබන්නෝ ද?158