34 : ලුක්මාන් – සත් පුරුෂයෙකුගේ නමක්

ලුක්මාන් – සත් පුරුෂයෙකුගේ නමක්

පරිච්ඡේදය: 31

මුළු වැකි ගණන : 34

ලූක්මාන් යනුවෙන් නම් දරන යහපත් දේව ගැතියෙකු තම පුත්‍රයාට ප්‍රකාශ කළ අනුශාසනා 13 වන වැකියේ සිට 19 වන වැකිය දක්වා සඳහන් වී තිබෙන බැවින් මෙලෙස නම් තබා ඇත.

අසීමිත කරුණාවන්තයා ද අසම සම දයාවන්තයා ද වන අල්ලාහ්ගේ නාමයෙන්…

31 : 01 අලිෆ්, ලාම්, මීම්.2

31 : 02 මේවා ප්‍රඥාවන්ත ධර්ම ග්‍රන්ථයේ වැකිවේ.

31 : 03 යහපත කරන අයට (මෙය)යහ මගක් ද දයාවක් ද වේ.

31 : 04 ඔවුහු සලාතය ඉටුකරති. සකාතය ද පිරිනමති. පරලොව1 ගැන ස්ථීර ලෙස ම විශ්වාස කරති.

31 : 05 ඔවුහු තම දෙවියන්ගෙන් (ලත්) යහමගෙහි සිටිති. ජය ලද්දෝ ඔවුහු ම ය.

31 : 06 අල්ලාහ්ගේ මාර්ගය විහිළුවක් සේ සලකා එයින් (ජනතාව)දැනුමෙන් තොරව නොමග යවනු පිණිස නිෂ්ඵල පුවත් මිල දී ගන්නා අය මිනිසුන් අතර සිටිති. ඔවුන්ට නින්දනීය වේදනාවක් ඇත.

31 : 07 ඔහු වෙත අපගේ වැකි ප්‍රකාශ කරන ලද්දේ නම් උඩඟු වූ කෙනෙක් ලෙස ද එය නොඇසූ කෙනෙක් මෙන් ද තම කන්හි ඇබයක් තිබෙන්නා සේ ද පිටුපාන්නේ ය. ඔහුට පීඩාකාරී වේදනාවක් ඇතැයි අවවාද කරන්න.

31 : 08 විශ්වාස කොට යහපත් ක්‍රියා කරන අයට ප්‍රමෝදමත් ස්වර්ගයන් ඇත.

31 : 09 ඔවුහු එහි සදාකාලීනව සිටිති. අල්ලාහ්ගේ පොරොන්දුව සැබෑ ය. ඔහු අබිබවන්නා ය, ප්‍රඥාවන්තයා ය.

31 : 10 ඔහු නුඹලාට දැකිය හැකි කුළුණු රහිත අහස් නිර්මාණය කළේය.240නුඹලා කම්පනය නොකරනු පිණිස පොළොවෙහි කූඤ්ඤ සවි කළේය.248එහි සියලූ වර්ගයේ සතුන් විසුරුවා හැරියේ ය. අපි අහසින් ජලය පහළ කළෙමු.507 එහි වටිනා සියලූ වර්ගයෙන් හට ගැන්වීමු.

31 : 11

මෙය අල්ලාහ්ගේ නිර්මාණය යි. ඔහු හැර අන්අය නිර්මාණය කළ දේ මට පෙන්වන්න. එහෙත් අපරාධකරුවෝ පැහැදිලි දුර් මාර්ගයක සිටිති.

31 : 12

“අල්ලාහ්ට කෘතඥ වන්න. කෘතඥ වන්නා තමන්ට ම කෘතඥ වේ. යමෙක් (එකමදෙවියන්) ප්‍රතික්ෂේප කරන්නේ ද අල්ලාහ් අවශ්‍යතාවලින් තොර කෙනෙකි,485 ප්‍රශංසනීය කෙනෙකි”යි (පවසා) අපි ලූක්මාන්ට ප්‍රඥාව පිරිනැමුවෙමු.

31 : 13 ලූක්මාන් තම පුත්‍රයාට අනුශාසනා කරන විට “මාගේ දයාබර පුතණුවනි, අල්ලාහ්ට සමානයන් කල්පනය නොකරන්න. සමානයන් කල්පනය කිරීම ඉමහත් අපරාධයක් යැ”යි ප්‍රකාශ කළ සැටි සිහිකරන්න.

31 : 14 මිනිසාට ඔහුගේ දෙමාපියන් ගැන අවධාරණය කර ඇත්තෙමු. ඔහුගේ මව දුබල බවින් දුබල බවටපත් වී ඔහු ඉසුලූවා ය. ඔහු කිරි පානය කරන කාලය වසර දෙකකි.314 මට ද නුඹේ දෙමාපියන්ට ද කෘතඥ වන්න. යළි පිවිසුම මා වෙතට ම ය.

31 : 15 නුඹට දැනුමක් නොමැති දැයක් මට සමානව කල්පනය කරන්නට ඒ දෙදෙනා නුඹට බල කළහොත් ඔවුන්ට අවනත නොවන්න. මෙලොවෙහි ඔවුන් සමඟ අලංකාර ලෙසින් ඇසුරු කරන්න. මා වෙතට හැරුණු අයගේ මාර්ගය අනුගමනය කරන්න. පසුව නුඹලාගේ යළි පිවිසුම මා වෙතට ම ය. නුඹලා කරමින් සිටිදේ ගැන නුඹලාට දැනුම් දෙන්නෙමි.

31 : 16 “මාගේ දයාබර පුතණුවනි, අබ ඇටයක් තරම් (ද්‍රව්‍යයක්) වී එය පර්වතයක් තුළ හෝ අහස් හි හෝ පොළොවෙහි හෝ තිබුණ ද අල්ලාහ් එය ගෙන එනු ඇත. අල්ලාහ් සූක්ෂම කෙනෙකි, ප්‍රවීණයෙකි.

31 : 17 “මගේ දයාබර පුතණුවෙනි, සලාතය ඉටුකරන්න. යහපත අණ කරන්න. අයහපත වළක්වන්න. නුඹට සිදුවනදේ ඉවසන්න. එය ස්ථීරසාර කාර්යයකි.”

31 : 18 මිනිසුන් ගෙන් නුඹේ මුහුණ හරවා නොගන්න. පොළොවෙහි ගර්වයෙන් යුතුව නොඇවිදින්න. අල්ලාහ් ගර්වයෙන් උඩඟු වන කිසිවෙකු ප්‍රිය නොකරයි.

31 : 19 “නුඹ ඇවිදින විට මධ්‍යස්ථ බව සුරකින්න. නුඹේ කටහඬ පහත් කරන්න. සියලූ හඬ වලින් පිළිකුල් සහගතවන්නේ බූරුවා ගේ හඬම යැ”(යි ද අනුශාසනා කළේය).

31 : 20 අහස්හි තිබෙන දැය ද පොළොවෙහි තිබෙන දැය ද නුඹලා වෙනුවෙන් අල්ලාහ් ප්‍රයෝජනවත් කළ සැටිද තම අනුග්‍රහයන් ප්‍රකටව හා රහසිගතව වැඩි වැඩියෙන් පිරිනමා තිබෙන සැටි ද නුඹලා නුදුටුවෙහු ද? දැනුම, යහ මග, ආලෝකය විහිදුවන ධර්ම ග්‍රන්ථය ආදී කිසිවක් නොමැතිව අල්ලාහ් ගැන තර්ක කරන අය ද මිනිසුන් අතර සිටිති.

31 : 21

“අල්ලාහ් පහළ කළ දැය අනුගමනය කරන්නැ”යි ඔවුනට පවසනු ලබන විට “අපගේ මුතුන් මිත්තන් කවරක දුටුවෙමු ද එය ම අපි අනුගමනය කරන්නෙමු”යි පවසති. නිරයේ වේදනාව වෙතට ෂෛතාන් ඔවුන් කැඳවූව ද?

31 : 22

යහපත කළ ලෙසින් තම මුහුණ අල්ලාහ් වෙත හරවා ගන්නා තැනැත්තා ශක්තිමත් කඹය තදින් අල්ලා ගත්තේ ය. කටයුතු වල අවසානය අල්ලාහ් වෙතට ම ය.

31 : 23

(අප) ප්‍රතික්ෂේප කරන අයගේ ප්‍රතික්ෂේපය ඔබ ශෝකයට පත් නොකරත්වා` ඔවුන්ගේ යළි පිවිසුම අප වෙතට ම ය. ඔවුන් කළ දැය ගැන අපි ඔවුනට දැනුම් දෙන්නෙමු. අල්ලාහ් සිත් හි තිබෙන දැය ගැන සර්වඥයෙකි.

31 : 24

අපි ඔවුනට ටික කලකට සැප පහසුකම් භුක්ති විඳීමට ඉඩ හරින්නෙමු. පසුව ඔවුන් දැඩි වේදනාවකට තල්ලූ කරන්නෙමු.

31 : 25

අහස් හා පොළොව නිර්මාණය කළේ කවරෙක් දැයි ඔබ ඔවුන්ගෙන් ඇසුවොත් අල්ලාහ් ම යැයි ඔවුහු පවසති. සියලූ ප්‍රශංසා අල්ලාහ්ට ම යැයි පවසන්න. නමුත් ඔවුන්ගෙන් බොහෝ දෙනෙක් නොදනිති.

31 : 26 අහස්හි ද පොළොවෙහි ද තිබෙන දේ අල්ලාහ්ට ම හිමිය. අල්ලාහ් අවශ්‍යතා වලින් තොර කෙනෙකි,485ප්‍රශංසනීය කෙනෙකි.

31 : 27 පොළොවෙහි තිබෙන සියලූ ගස් පන් හිඳ වී සාගරය සමඟ තවත් සාගර හතක් (තීන්ත වී) පිහිටවූවත් අල්ලාහ්ගේ නියෝග ලියා නිම කළ නොහැකිය.155අල්ලාහ් අබිබවන්නා ය, ප්‍රඥාවන්තයා ය.

31 : 28 නුඹලා නිර්මාණය කිරීම ද පණ ගන්වා නැගිටුවීම ද එක් ප්‍රාණයක් (නිර්මාණය කිරීම) බඳු ය. අල්ලාහ් සවන් දෙන්නෙකි,488 බලන්නෙකි.488

31 : 29 අල්ලාහ් රාත්‍රිය දහවලෙහි ඇතුල් කිරීමත් දහවල රාත්‍රියෙහි ඇතුල් කිරීමත් ඉර ද සඳ ද තම පාලනයේ තබාගෙන සිටීමත් ඔබ නොදන්නෙහි ද? සියල්ල නියමිත කාලයක් දක්වා ගමන් කරමින් සිටියි.241අල්ලාහ් නුඹලා කරන දැය ගැන ප්‍රවීණයෙකි.

31 : 30 මෙයට හේතුව අල්ලාහ් ම සත්‍යවන්තයෙක් ද ඔහු හැර ඔවුන් කැඳවනදේ අසත්‍ය ඒවා ද වීමත් අල්ලාහ් උත්කෘෂ්ට හා අති ශ්‍රේෂ්ඨ වීමත් ය.

31 : 31 අල්ලාහ් තම සාධක නුඹලාට පෙන්වනු පිණිස ඔහුගේ දයාවෙන් මුහුදේ නැව් යාත්‍රා කරනු ඔබ නුදුටුවෙහි ද? කළ ගුණ සලකන ඉවසිලිවන්ත සෑම කෙනෙකුට ම මෙහි සාධක රැසක් ඇත.

31 : 32 වහල වල් මෙන් රළ ඔවුන් වසා ගන්නා විට චිත්ත පාරිශුද්ධියෙන් නැමදුම ඔහුට ම පිළිගන්වා ඔහු වෙත ප්‍රාර්ථනා කරති. ඔවුන් මුදවා ගොඩට ගෙනා විට ඔවුන් අතර යුක්ති සහගතව කටයුතු කරන අය ද සිටිති.අකෘතඥ කුමන්ත්‍රණකරුවන් මිස අන් කිසිවෙක් අපගේ සාධක ප්‍රතික්ෂේප නොකරති.

31 : 33 මිනිසුනි, නුඹලාගේ දෙවියන්ට බිය බැතිමත් වන්න. පියා පුතෙකු ආරක්ෂා කළ නොහැකි, පුතා පියාව සුළු වශයෙන්වත් ආරක්ෂා කළ නොහැකි දිනකට1 බිය වන්න. අල්ලාහ්ගේ පොරොන්දුව සැබෑ ය.මෙලොව ජීවිතය නුඹලා මුළා නොකරත්වා. මුළා කරන්නා ද අල්ලාහ් ගැන නුඹලා මුළා නොකරත්වා.

31 : 34 යුගාන්ත මොහොත1ගැන දැනුම අල්ලාහ් වෙත ම ඇත. ඔහු වර්ෂාව පහළ කරයි. ඔහු ගර්භය තුළ තිබෙන දැය දනියි. හෙට දින තමන් ඉපැයීමට තිබෙන දැය ගැන කිසිවෙක් නොදනියි. තමන් මරණයට පත්වන්නේ කොතැනක දැයි ද කිසිඳු ජීවියෙක් නොදනියි. අල්ලාහ් සර්වඥයෙකි, ප්‍රවීණයෙකි.