29 : අල් අන්කබූත් – මකුළුවා

අල් අන්කබූත් – මකුළුවා

පරිච්ඡේදය: 29

මුළු වැකි ගණන : 69

මෙම පරිච්ඡේදයේ 41 වන වැකියේ සාවද්ය දේව ප්‍රතිපත්තියක් අදහන අයට මකුළු දැල උපමා කරනු ලබන බැවින් මෙසේ නම් කරන ලදී.

අසීමිත කරුණාවන්තයා ද අසම සම දයාවන්තයා ද වන අල්ලාහ්ගේ නාමයෙන්…

29 : 01 අලිෆ්.ලාම්.මීම්.2

29 : 02 “විශ්වාස කළෙමු”යි ප්‍රකාශ කළ නිසා පරීක්ෂා කරනු නොලැබ අත් හැර දමනු ලබතියි මිනිස්සු සිතා ගත්තෝ ද?

29 : 03 අපි ඔවුනට පෙර සිටි අය ද පරීක්ෂා කළෙමු.484 අල්ලාහ් සත්‍ය ප්‍රකාශ කරන අය ගැන දනියි. අසත්‍ය ප්‍රකාශ කරන අය ගැන ද දනියි.

29 : 04 අප අබිබවා යා හැකි යැයි අයහපත කළ අය සිතා ගත්තෝ ද? ඔවුන් දෙන විනිශ්චය ඉතා නරක ය.

29 : 05 යමෙක් අල්ලාහ්ගේ හමු වීම488 අපේක්ෂා කරන්නේ ද එයට නියමිත අල්ලාහ්ගේ කාල සීමාව පැමිණෙන්නේ ම ය.ඔහු සවන් දෙන්නා ය.488සර්වඥ ය.

29 : 06 උපයන්නා තමා වෙනුවෙන් ම උපයයි.අල්ලාහ් ලෝවැසියන් කෙරෙන් අවශ්‍යතා වලින් තොර කෙනෙකි.485

29 : 07 විශ්වාස කොට යහපත් ක්‍රියා කරන අයගේ පාපයන් අපි ඔවුන්ගෙන් මකා දමන්නෙමු. අපි ඔවුන් කරමින් සිටි යහපත් දේ සඳහා ඔවුනට කුලී පිරිනමන්නෙමු.498

29 : 08 තම දෙමාපියන්ට උවටැන් කරන ලෙස අපි මිනිසාට අවධාරණය කර ඇත්තෙමු. නුඹට දැනුමක් නොමැති දැයක් මට සමාන ව කල්පනය කරන ලෙස ඒ දෙදෙනා නුඹට බල කළහොත් ඔවුනට අවනත නොවනු. නුඹලාගේ යළි පිවිසුම මා වෙත ම ය. නුඹලා කරමින් සිටි දැය ගැන මම නුඹලාට දන්වන්නෙමි.

29 : 09 විශ්වාස කොට යහපත් ක්‍රියා කළ අය සත් පුරුෂයින් සමඟ එක් කරන්නෙමු.

29 : 10 “අල්ලාහ් ගැන විශ්වාස කළෙමු”යි පවසන අය ද මිනිසුන් අතර සිටිති. ඔවුහු අල්ලාහ්ගේ විෂයයෙහි පීඩාවට පත් කරනු ලබන විට මිනිසුන්ගේ හිරිහැරය අල්ලාහ්ගේ වේදනාව සේ සලකති. ඔබේ දෙවියන් වෙතින් පිහිටක් පැමිණියේ නම් “අපි නුඹලා සමඟ සිටියෙමු”යි පවසති. ලෝවැසියන්ගේ සිත් තුළ තිබෙන දේ ගැන අල්ලාහ් මැනවින් නොදන්නේ ද?

29 : 11

අල්ලාහ් විශ්වාස කළ අය ගැන දනියි. කුහකයින් ගැන ද දනියි.

29 : 12

“නුඹලා අපේ මාර්ගය අනුගමනය කරන්න. අපි නුඹලාගේ පාප (බර) උසුලන්නෙමු”යි (එකම දෙවියන්) ප්‍රතික්ෂේප කළ අය විශ්වාස කළ අයට පවසති. ඔවුන්ගේ පාපයන්ගෙන් කිසිවක් මොවුහු උසුලන අය නොවෙති. ඔවුහු අසත්‍ය පවසන්නෝ වෙති.

29 : 13 ඔවුහු තම බර ද තම බර සමඟ වෙනත් බර කිහිපයක් ද උසුලති.254 ඔවුන් ප්‍රබන්ධ කළ දේ ගැන කියාමත් දින1 විමසනු ලබති.

29 : 14 අපි නූහ්ව ඔහුගේ ජන සමාජය වෙත එවීමු. ඔහු වසර දහසකට වසර පනහක් අඩුවෙන්483 ඔවුන් සමඟ වාසය කළේය.ඔවුන් අපරාධකරුවන් ව සිටිය දී මහා ජල ගැල්ම ඔවුන් හසු කර ගත්තේ ය.

29 : 15 අපි ඔහු ද ඔහු සමඟ නැවෙහි සිටි අය ද ආරක්ෂා කළෙමු. මෙය ලෝවැසියන්ට සාධකයක් කළෙමු.222

29 : 16 “අල්ලාහ් නමදින්න. ඔහුට ම බිය වන්න.නුඹලා දැන සිටියහොත් මෙය නුඹලාට ඉතා යහපත් යැ”යි ඉබ්‍රාහීම් තම ජන සමාජයට ප්‍රකාශ කළ සැටි සිහි කරන්න.

29 : 17 අල්ලාහ් හැර නුඹලා මනඃකල්පිත ව නිර්මාණය කළ ප්‍රතිමා වලට නමදින්නෙහු ය.අල්ලාහ් හැර නුඹලා කවරකට නැමදුම් කරන්නෙහු ද ඔවුනට නුඹලාට සම්පතක් පිරිනැමිය නොහැකිය. එබැවින් සම්පත අල්ලාහ් වෙත ම සොයන්න. ඔහු ම නමදින්න. ඔහුට ම කෘතඥ වන්න. ඔහු වෙත ම යළි ගෙන එනු ලබන්නෙහු ය.

29 : 18 නුඹලා අසත්‍ය යැයි සිතුවහොත් නුඹලාට පෙර බොහෝ ජන සමාජයන් අසත්‍ය යැයි සිතා ඇත්තා හ. පැහැදිලි ව ප්‍රකාශ කිරීම මිස දූතයා කෙරෙහි වෙන (යුතුකමක්) නැත.81

29 : 19 අල්ලාහ් පළමුව නිර්මාණය කරන්නේ කෙසේ දැයි ඔවුහු නොදන්නෝ ද? පසුව ඔහු එය නැවත නිර්මාණය කරයි. අල්ලාහ්ට මෙය පහසු ය.

29 : 20 “පොළොවෙහි සංචාරය කරන්න. අල්ලාහ් පළමුව නිර්මාණය කළේ කෙසේ දැයි බලන්නැ”යි පවසන්න. පසුව අල්ලාහ් තැවත වතාවක් උත්පාදනය කරයි. අල්ලාහ් සියලූ දේ කෙරෙහි බලසම්පන්නයෙකි.

29 : 21 ඔහු සිතූ කෙනෙකුට දඬුවම් කරයි. සිතූ කෙනෙකුට දයාව දක්වයි. නුඹලා ඔහු වෙත ම ගෙන යනු ලබන්නෙහු ය.

29 : 22 නුඹලා අහස් හි ද පොළොවෙහි ද (දෙවියන්) ජයග්‍රහණය කරන්නෝ නොවන්නෙහු ය. අල්ලාහ් හැර නුඹලාට භාරකරුවෙක් හෝ උදව්කරුවෙක් හෝ නැත.

29 : 23 අල්ලාහ්ගේ වැකි ද ඔහු හමු වීම488 ද ප්‍රතික්ෂේප කළ අය මාගේ දයාවෙහි බලාපොරොත්තු සුන් කර ගත්හ.471 ඔවුනට පීඩාකාරී වේදනාවක් ඇත.

29 : 24 “මොහු ඝාතනය කරන්න. නැතහොත් ගිනි තබා පුළුස්සා දමන්නැ”යි ප්‍රකාශ කිරීම මිස අන් කිසිවක් ඔහුගේ ජන සමාජයේ පිළිතුර නොවීය. අල්ලාහ් ඔහු ගින්නෙන් ආරක්ෂා කළේය. විශ්වාස කරන ජනතාවට මෙහි සාධක රැසක් ඇත.

29 : 25 මෙලොව ජීවිතයෙහි නුඹලා අතර පවතින ස්නේහය හේතු කොට ගෙන නුඹලා අල්ලාහ් හැර ප්‍රතිමාවන් පිහිටුවා ගත්තෙහු ය.පසුව කියාමත දින1 නුඹලාගෙන් ඇතැමෙක් ඇතැමෙකු ප්‍රතික්ෂේප කරයි. නුඹලාගෙන් ඇතැමෙක් ඇතැමෙකුට ශාප කරයි.නුඹලාගේ නවාතැන නිරයයි.නුඹලාට උදව් කරන අය ද නැත.

29 : 26 ලුත් ඔහු විශ්වාස කළේය.“මම මාගේ දෙවියන් වෙතට හිජ්රත්460 කිරීමට යන්නෙමි. ඔහු අබිබවන්නා ය. ප්‍රඥාවන්තයා යැ”යි (ඉබ්‍රාහිම්) පැවසීය.

29 : 27 අපි ඔහුට ඉස්හාක් ද යඃකූබ් ද තිළිණ කළෙමු. ඔහුගේ පෙළපතෙහි නබිත්ත්වය ද ධර්ම ග්‍රන්ථය ද පිහිටු වීමු. මෙලොව දී ඔහුගේ කුලිය ඔහුට පිරිනැමුවෙමු. ඔහු පරලොවෙහි සත් පුරුෂයින් සමඟ සිටියි.

29 : 28 (අපි) ලුත් ද (එවීමු). “නුඹලා අශිෂ්ට සම්පන්න ක්‍රියාව කරන්නෙහු ය.නුඹලාට පෙර ලෝවැසියන්ගෙන් කිසිවෙක් මෙය නොකළහ.”

29 : 29 “නිවැරදි මාර්ගය විසන්ධි කොට පිරිමීන් වෙත යන්නෙහු ය. නුඹලාගේ සභාවෙහි එම පිළිකුල් සහගත ක්‍රියාව කරන්නෙහු දැ”යි ඔහු තම ජන සමාජයට ප්‍රකාශ කළ විට “නුඹ සත්‍යවන්තයෙක් නම් අල්ලාහ්ගේ වේදනාව ගෙන එන්නැ”යි ප්‍රකාශ කිරීම මිස අන් කිසිවක් ඔහුගේ ජන සමාජයේ පිළිතුර නොවීය.”

29 : 30 “මාගේ දෙවියනි, දූෂණ කරන මෙම ජන සමාජයට එරෙහිව මට පිහිට වනු මැනවැ”යි (ලුත්) පැවසීය.

29 : 31 “අපේ දූතවරු161 ඉබ්‍රාහීම් වෙතට සුබාරංචිය ගෙන ආ විට “එම ග්‍රාමවාසීහූ අපරාධකරුවන් ව සිටිති. අපි එම ග්‍රාමවාසීන් විනාශ කරන්නට යන්නෙමු”යි පැවසූ හ.

29 : 32 “එහි ලුත් සිටින්නේයැ”යි (ඉබ්‍රාහිම්) පැවසීය. “එහි සිටින අය ගැන අපි ඉතා හොඳින් දනිමු.” ඔහු ද ඔහුගේ භාර්යාව හැර ඔහුගේ පවුලේ සෙසු අය ද අපි ආරක්ෂා කරන්නෙමු. ඇය (විනාශ වන්නන් සමඟ) නතර වන්නී යැ”යි (දූතවරු) පැවසූ හ.

29 : 33 අපේ දූතවරු161 ලුත් වෙතට පැමිණි විට ඔහු ඔවුන් විෂයයෙහි කනස්සලයට පත් විය. ඔවුන් වෙනුවෙන් කිසිවක් කළ නොහැකිව මානසිකව පීඩා වින්ඳේ ය. එයට ඔවුහු “ඔබ බිය නොවන්න. දුක් නොවන්න. අපි ඔබ ද ඔබේ භාර්යාව හැර ඔබේ පවුලේ සෙසු අය ද ආරක්ෂා කරන්නෙමු. ඇය (විනාශ වන්නන් සමඟ) නතර වන්නී යැ”යි පැවසූ හ.

29 : 34 ඔවුන් වැරදි කරමින් සිටි බැවින් අපි එම ග්‍රාමවාසීන් කෙරෙහි අහසින් දඬුවමක් පහළ කරන්නට යන්නෙමු”(යි ද ඔවුහු පැවසූ හ).

29 : 35 වටහා ගන්නා ජනතාවට අපි එහි පැහැදිලි සාධකයක් අත් හැර දමා ඇත්තෙමු.

29 : 36 (අපි) මද්යන් නගරයට ඔවුන්ගේ සොහොයුරු ෂුඅයිබ් (එවීමු) . “මාගේ ජනතාවනි, අල්ලාහ් ම නමදින්න. අවසාන දිනය1 ගැන විශ්වාස කරන්න. පොළොවෙහි අවුල් ඇති කරන්නෝ ව නොසැරිසරන්නැ”යි ඔහු පැවසීය.

29 : 37 ඔහු අසත්‍ය පවසන්නෙක් යැයි ඔවුහු සිතූ හ. භූමිකම්පාව ඔවුනට පහර දුණි. උදෑසන ම ඔවුහු තම නිවෙස්වල වැතිරී සිටිය හ.

29 : 38 (අපි) ආද් සහ සමූද් ජන සමාජය ද (විනාශ කළෙමු). ඔවුන්ගේ වාසස්ථාන වලින් ම මෙය නුඹලාට පැහැදිලි වී ඇත. ෂෛයිතාන් ඔවුන්ගේ ක්‍රියා ඔවුනට අලංකාර කොට පෙන්වීය. ඔවුහු බුද්ධිමත් අය වූව ද (ෂෛයිතාන්) ඔවුන් (යහ) මාර්ගයෙන් වැළැක්වීය.

29 : 39 (අපි) කාරූන් ද ෆිර්අවුන් ද හාමාන් ද (විනාශ කළෙමු). මූසා ඔවුන් වෙත පැහැදිලි සාධක ගෙන ආවේ ය. ඔවුහු පොළොවෙහි උඩඟු වූහ. ඔවුහු ජයග්‍රහණය කරන්නෝ නොවූහ.

29 : 40 අපි සෑම කෙනෙකුට ම තම තමන්ගේ පාපයන් වෙනුවෙන් දඬුවම් කළෙමු. ඔවුන්ගෙන් ඇතැමුන් කෙරෙහි ගල් වර්ෂාවක් එවීමු. ඔවුන්ගෙන් ඇතැමුන්ට මහත් ශබ්දය පහර දුණි. ඔවුන්ගෙන් ඇතැමුන් පණ පිටින් පොළොව තුළට වැළලීමට සැලැස්වීමු. ඔවුන්ගෙන් ඇතැමුන් දියෙහි ගිල්වීමු. අල්ලාහ් ඔවුනට අපරාධ කරන්නෙක් නොවේ. නමුත් ඔවුහු තමන්ට ම අපරාධ කර ගත්හ.

29 : 41 අල්ලාහ් හැර (අන් අය) ආරක්ෂකයින් ලෙස ගත් අයගේ උපමාව මකුළුවා බඳුය. ඌ නිවසක් තනා ගත්තේ ය. නිවෙස්වලින් ඉතාමත් දුර්වල ම නිවස මකුළුවාගේ නිවස ය. (එය) ඔවුන් දැනගත යුතු නොවේ ද?

29 : 42 අල්ලාහ් හැර ඔවුන් ප්‍රාර්ථනා කරන දේ ගැන අල්ලාහ් දනියි. ඔහු අබිබවන්නා ය. ප්‍රඥාවන්තයා ය.

29 : 43 අපි මෙම උපමාවන් මිනිසුන් වෙනුවෙන් ගෙන හැර දක්වන්නෙමු. බුද්ධිමතුන් මිස අන් අය මෙය වටහා නොගනිති.

29 : 44 අල්ලාහ් අහස් ද පොළොව ද සාධාරණ හේතුවක් මත නිර්මාණය කළේය. විශ්වාස කළ අයට මෙහි සාධකයක් ඇත.

29 : 45 (මුහම්මද්,) ධර්ම ග්‍රන්ථයෙන් ඔබට දැනුම දෙනු ලබන දේ ප්‍රකාශ කරන්න. සලාතය ඉටු කරන්න. සලාතය අශිෂ්ට සම්පන්න ක්‍රියාවන්ගෙන් ද අයහපතෙන් ද වළක්වයි. අල්ලාහ් සිහි කිරීම අති ශ්‍රේෂ්ඨ ය. නුඹලා කරන දේ ගැන අල්ලාහ් දනියි.

29 : 46 ධර්ම ග්‍රන්ථය හිමි අය අතුරින් අපරාධ කළ අය හැර අන් අය27 සමඟ අලංකාර ලෙසින් මිස විවාද නොකරන්න. ”අපට පහළ වූ දේ ගැන ද නුඹලාට පහළ වූ දේ ගැන ද අපි විශ්වාස කරන්නෙමු. අපේ දෙවියන් ද නුඹලාගේ දෙවියන් ද එක් කෙනෙකි. අපි ඔහුට ම අවනත වූ අය වන්නෙමු”යි පවසන්න.

29 : 47 මෙලෙස අපි ඔබට ධර්ම ග්‍රන්ථය පහළ කළෙමු. අපි කවරෙකුට ධර්ම ග්‍රන්ථය පිරිනැමුවෙමු ද ඔවුහු මෙය විශ්වාස කරති. (ධර්ම ග්‍රන්ථයක් නොදෙන ලද) මොවුන් අතුරින් ද මෙය විශ්වාස කරන අය සිටිති. (අප) ප්‍රතික්ෂේප කරන අය මිස අන් කිසිවෙක් අපේ වැකි ප්‍රතික්ෂේප නොකරති.

29 : 48 (මුහම්මද්,) ඔබ මීට පෙර කිසිඳු ධර්ම ග්‍රන්ථයකින්4 කියවන්නෙක් නොවූයෙහිය.(මින් මතුවටත්) ඔබේ දකුණ’තින් එය නොලියන්නෙහි ය.152 ) 312 එසේ වී නම් නාස්තිකාරයෝ සැක කරන්නට තිබුණි.

29 : 49 නමුත් මේවා පැහැදිලි වැකි වේ. අධ්‍යාපනය දෙන ලද අයගේ සිත් තුළ පවතී.420 අපරාධකරුවන් මිස අන් කිසිවෙක් අපේ වැකි ප්‍රතික්ෂේප නොකරති.

29 : 50 “මොහුට මොහුගේ දෙවියන් වෙතින් ප්‍රාතිහාර්යයන් පහළ විය යුතු නොවේ දැ”යි ඔවුහු අසති. “ප්‍රාතිහාර්යය අල්ලාහ් වෙත ම ඇත. මම පැහැදිලිව අවවාද කරන්නෙක් පමණි” යැයි (මුහම්මද්,) පවසන්න.

29 : 51 අපි ඔබට මෙම ධර්ම ග්‍රන්ථය පහළ කොට එය ඔවුනට ප්‍රකාශ කරනු ලැබීම ඔවුනට ප්‍රමාණවත් නොවේ ද? විශ්වාස කරන ජනතාවට මෙහි දයාවක් ද අනුශාසනාවක් ද ඇත.

29 : 52 “මා හා නුඹලා අතර අධීක්ෂණය කිරීමට අල්ලාහ් ප්‍රමාණවත් ය. ඔහු අහස් හි ද පොළොවෙහි ද තිබෙන දැය ගැන දනියි. නිෂ්ඵල දැය ගැන විශ්වාස කොට අල්ලාහ් ප්‍රතික්ෂේප කළ අය අලාභ ලද්දෝ වෙති”යි පවසන්න.

29 : 53 ඔවුහු ඔබ වෙත වේදනාව හදිසියෙන් ම සොයති. නියම කරන ලද කාල සීමාවක් නොවූයේ නම් වේදනාව ඔවුනට පැමිණෙන්නට තිබුණි. ඔවුහු නොදැනුවත් ව ම එය ඔවුන් වෙත හදිසියේ ම පැමිණෙනු ඇත.

29 : 54 ඔවුහු වේදනාව ඔබ වෙත හදිසියෙන් ම සොයති. නිරය (එකම දෙවියන්) ප්‍රතික්ෂේප කළ අය වටලන්නේ ම ය.

29 : 55 ඔවුනට ඉහළින් ද ඔවුන්ගේ පාද වලට පහළින් ද වේදනාව ඔවුන් වටලන දින1 “නුඹලා කරමින් සිටි දැය භුක්ති විඳින්නැ”යි (දෙවියන්) පවසයි.

29 : 56 “විශ්වාස කළ මාගේ වහලූනි, මාගේ පොළොව සුවිශාල ය. මට ම නමදින්න.

29 : 57 සෑම කෙනෙක් ම මරණය රස විඳින්නේ ම ය. පසුව නුඹලා අප වෙත ම ගෙන එනු ලබන්නෙහු ය.

29 : 58 විශ්වාස කොට යහපත් ක්‍රියා කළ අය ස්වර්ගයෙහි තිබෙන මාළිගා වල පදිංචි කරවන්නෙමු. ඒවා යටින් ගංගා ගලා බසියි. ඔවුහු එහි සදාකාලීනව සිටිති. ඉපැයූ අයගේ කුලිය ඉතා යහපත් ය.

29 : 59 ඔවුහු ඉවසිලිමත් ව සිටිති. තම දෙවියන් කෙරෙහි ම රඳා පවතිති.

29 : 60 තමන්ගේ ආහාරය නොඋසුලන කොපමණ ජීවීහූ සිටිත් ද? උන්ට ද නුඹලාට ද ආහාර සපයන්නේ අල්ලාහ් ම ය. 463 ඔහු සවන් දෙන්නා ය.488 සර්වඥ ය.

29 : 61 අහස් හා පොළොව නිර්මාණය කළ තැනන් ද ඉරත් සඳත් තම පාලනය යටතේ තබා සිටින්නා ද කවරෙක්දැයි ඔබ ඔවුන්ගෙන් ඇසුවෙහි නම් “අල්ලාහ් ම යැ”යි ඔවුහු පවසති. එසේ නම්, ඔවුන් වෙන’තකට හරවනු ලබන්නේ කෙසේ ද?

29 : 62 අල්ලාහ් තම වහලූන්ගෙන් තමා සිතූ අයට ධනය වැඩියෙන් පිරිනමයි. තමා සිතූ අයට සීමිතව ද පිරිනමයි. අල්ලාහ් සියලූ දේ ගැන සර්වඥයෙකි.

29 : 63 අහසින් 507 ජලය පහළ කොට පොළොව මළ පසු එමගින් එයට ජීවය දෙන්නා කවරෙක්දැයි ඔබ ඔවුන්ගෙන් ඇසුවෙහි නම් “අල්ලාහ් ම යැ”යි පවසති. “සියලූ ප්‍රශංසා අල්ලාහ්ට ම යැ”යි පවසන්න. නමුත් ඔවුන්ගෙන් බොහෝ දෙනෙක් වටහා නොගනිති.

29 : 64 මෙලොව ජීවිතය විනෝදයක් හා කෙළියක් මිස වෙන නැත. සැබෑ ජීවිතය නම් පරලොව ජීවිතයයි. ඔවුන් දැනගත යුතු නොවේ ද?

29 : 65 ඔවුහු නැවෙහි යාත්‍රා කරන විට ප්‍රාර්ථනාව ඔහුට පමණක් චිත්ත පාරිශුද්ධියෙන් පිළිගන්වා අල්ලාහ් වෙත ම ප්‍රාර්ථනා කරති. ඔවුන් ආරක්ෂා කොට ඔහු ගොඩට ගෙනා විට ඔවුහු සමානයන් කල්පනය කරති.

29 : 66 අපි ඔවුනට පිරිනැමූ දේ ඔවුහු ප්‍රතික්ෂේප කරත්වා` සැප භුක්ති විඳිත්වා` මතුවට දැන ගනිති.

29 : 67 මොවුන් වටා සිටින මිනිසුන් පැහැර ගෙන යනු ලබමින් සිටියදීත් අපි (මොවුනට) අභය සලසන පුණ්ය භුමියක් පිහිටුවා තිබෙන සැටි ඔවුහු නුදුටුවෝ ද? 34 නිෂ්ඵල දේ ගැන විශ්වාස කොට අල්ලාහ්ගේ අනුග්‍රහයට අකෘතඥ වන්නෝ ද?

29 : 68 අල්ලාහ් කෙරෙහි අසත්‍යය ප්‍රබන්ධ කරන්නාට වඩා හෝ තමා වෙත පැමිණි සත්‍යය අසත්‍ය යැයි සිතූ තැනැත්තාට වඩා හෝ මහා අපරාධකරුවා කවරෙක් ද? (එකම දෙවියන්) ප්‍රතික්ෂේප කරන අයට නිරයෙහි නවාතැනක් නැද්ද?

29 : 69 අප විෂයයෙහි උපයන අයට අපේ මාර්ග පෙන්වන්නෙමු. අල්ලාහ් යහපත කරන අය සමඟ සිටියි.